٦٧ عمل خيري ممكن تعمله بشكل يومي 💗

١- الدعاء في طريق السفر لأي حد تشوفه

٢- لو نفسك في دعوة معينة طلع صدقات كتير يومياً

٣- كل فترة تجمع من أهل بيتك مبلغ وتطلعوه صدقة

٤- يكون في طبق اكل ثابت لمناديب التوصيل باللي موجود في البيت ولو مش متاح حاجة نعمل حتى سندوتش جبنة أو فاكهة

٥- شكارة دراي فود في شنطة عربيتك

٦- بواقي ازايز الميه نحط فيهم ميه للعصافير في البلكونة وبواقي الفاكهة

٧- بواقي العضم للكلاب

٨- ما تمسحش رقم حد متوفي عشان تفضل فاكره وتدعيله بالرحمة

٩- لما تروحي المسجد اتكلمي مع البنات الصغيرة وعلميهم الصلاة واديهم كتب دينية هدية

١٠- لو حد حصل معاه حاجة محرجة اعمل نفسك مش واخد بالك وما تكسفش حد حتى لو بهزار

١١- لو خادت كورس او معلومة حاول تشرحها لحد تاني وتيسر للناس عامة قدر الإمكان

١٢- جبر الخواطر للناس اللي حواليك، قولي لصاحبتك مثلا شكلك حلو النهارده

١٣- اطبع ورق ذكر وحطه في مدخل العمارة

١٤- خلي معاك سبحة إلكترونية أو مصحف جديد او ورق اذكار وكل يوم تديه

١٥- خلي معاك ازازة ميه زيادة وقلم جاف زيادة لو حد احتاج

١٦- كل فترة اعزم حد من صحابك علي الفطار

١٧- اي حد تعرفه هيتجوز أو مقبل علي شيء في حياته صلي قيام الليل وادعيله بالتوفيق والبركة

١٨- خصصي ذكر معين لكل عمل بتعمليه في البيت، نشر الغسيل مثلاً وانتي بتستغفري، وشغلي إذاعة القرآن الكريم في المطبخ

١٩- قبل ما تنام اقرأ الفاتحة وافتكر كل المتوفيين وادعيلهم

٢٠- ادي الاطفال اللي بيروحوا المسجد فلوس بسيطة تشجعهم

٢١- اشتري اظرف صغيرة من المكتبة وحط جوا كل ظرف فلوس ٢٠ جنيه أو ٥٠ أو ١٠٠ حسب مقدرتك واديهم للناس اللي تشوفهم في الشارع محتاجين

٢٢- اعمل فولدر فيه صور ناس متوفية حتى لو متعرفهاش عشان تدعيلها

٢٣- لو لقيت اكونت حد متوفي اسمع القرآن اللي هو منزله وشيره

٢٤- لما بشوف حشرة مش مؤذية مش بقتلها

٢٥- بخلي صابون معايا في شنطتي وانا خارجة واحطه في أي حمام من الحمامات اللي برا

٢٦- لو ركبت ميكروباص بفضل ادعي لكل الراكبين ربنا يعفو عننا وعن تقصيرنا

٢٧- لو لقيت بنوتة بتطلع شعرها من الطرحة او ولد بيشرب سجاير بدعيلهم بالهداية والصلاح

٢٨- بنوتة نفسها تتجوز فراحت جابت هدايا الجواز لبنت غير مقتدرة وربنا كرمها واتجوزت

٢٩- لو جيبت سندوتش من مطعم تجيب واحد زيادة لحد محتاج

٣٠- وانت في المول زود حاجات حلوة وادي للناس بتوع النظافة منها

٣١- كل ما تشوف حد كبير في السن في الشارع هات له كيك وعصير

٣٢- لما تلاقي ام واخدة اتنين من عيالها علي رجلها عشان مش عارفه تدفع الأجرة ادفع لهم

٣٣- اي مكان تروحه ما تمشيش منه إلا وانت سايب حاجة تشهد لك يوم القيامة

٣٤- اتعلم تصحيح سورة الفاتحة والتجويد وكل ما تقابل طفل او حد كبير علمها له واشرحها بطريقة ما ينسهاش

٣٥- كل ما تلاقي حد انت عارفه بيمر بوضع صعب حالة نفسية صعبة تصدق عنه

٣٦- حاجة اتعلمتها من باب أحسن لمن أساء إليك، بدل ما اقعد ادعي علي الشخص اللي ضايقني بدعيله ربنا يغفر له ويهديه

٣٧- حط اكل للطيور والقطط وميه في الشارع ليهم

٣٨- لو رايحين مناسبة أو زيارة لحد نفضل ندعيله طول ما احنا في الطريق، ولما ننزل ندعيله بالبركة وصلاح الحال

٣٩- لما تجيب حاجة جديدة اول استعمال يكون في الخير، مثلاً لو عربية توصل حد أو توزع بيها إطعام، عجان في المطبخ يبقي تعملي حلويات وتوزعيها، جبت هدوم جديدة لولادك فتتصدق بالهدوم اللي مش محتاجها

٤٠- لو عندك مشكلة في حاجة تتصدق من نفس نوع المشكلة، مشكلة في الزواج تتصدق لبنات بتتجهز، حد مريض تتصدق في علاج مريض تاني

٤١- لما تفتح علبة تونة اغسلها بميه وصابون قبل ما ترميها عشان القطط والكلاب بيشموا ريحتها فممكن يتعوروا بسبب العلبة فيتاذوا

٤٢- تدعي في سرك لما تشوف زوج وزوجة كويسين مع بعض أو لو شوفت عيلة تدعيلهم ربنا يبارك لهم ويقويهم

٤٣- لو شوفت حد عنده نعمة معينة تقول ما شاء الله لا قوة إلا بالله اللهم قربهم إليك بما اعطيتهم واعطني مما اعطيتهم

٤٤- مش برمي أي حاجة في الشارع حتى لو منديل وبحتسب العمل ده بنية التخفيف عن عمال النظافة وعدم أذية الناس في الشارع

٤٥- لو عديت علي طريق فيه مقابر بسلم عليهم واقولهم اسأل الله العظيم رب العرش العظيم ان من كان منكم بالنار يدخله الجنة ثم يرفع درجاته حتى يصل للفردوس الاعلى، ومن كان منكم في الجنة يرفعه ربه للفردوس الاعلى

٤٦- تستر عيوب الناس أو حاجة شوفتها

٤٧- هات ازازة واقطعها وحطها علي السطح وحط فيها ميه للطيور وفي مدخل البيت كمان

٤٨- لما تكون بتتفرج علي فيديو ديني أو هادف انزل في الكومنتات واضغط اعجاب لاي تعليق مكتوب فيه (النهارده بدأت احفظ قرآن ، أو أنتظمت في الصلاة) وغيرها الكثير من أوجه الخير وقد تكون سبب في تجديد التوبة للشخص ده

٤٩- لما تلاقي حد منزل استوري فيه قرآن اسمعه للآخر وكذا مرة عشان ياخد الأجر

٥٠- نزل قران في صفحتك للناس المتوفية اللي ملهاش حد يتصدق عنها

٥١- لما تكون ماشي في الشارع جنب اي طير أو حيوان بياكل حاول تمشي بعيد عنه عشان ما تخوفوش ويقدر ياكل بأمان

٥٢- كل يوم شيل فلوس علي جنب ٥ جنيه او ١٠ جنيه واخر الاسبوع أتصدق بيهم

٥٣- بعد ما تاكل التمر خد النواة في شنطة وارميه في أي مكان فاضي يكون صالح للزراعة عشان تطلع نخلة

٥٤- العضم اللي بترميه في الزبالة سمي عليه قبل ما ترميه عشان اخواتنا من المسلمين الجن يأكلوه واحتسبها صدقة عند الله، وبرضه سمي علي العضم اللي في الشارع

٥٥- الاكل الفايض جمعه في كيس منفصل عن كيس الزبالة عشان القطط توصله بسهولة

٥٦- خلي معاك خواتم تسبيح تهادي بيها الناس دايما

٥٧- ادخل علي صفحة اي حد متوفي وشارك اي فيديو منزله فيه قرآن

٥٨- ثبت يوم في الاسبوع للصدقة وكل مرة تكون صدقة مختلفة، وعدد النوايا مثلاً صدقة عنك وعن أصحاب الحقوق سواء دين أو غيبة عشان يوم القيامة محدش ياخد منك حسنات

٥٩- قبل الوظيفة أخرج صدقة، اول يوم شغل أخرج صدقة، قبل الامتحان أخرج صدقة، قبل اي حد عندك حتى لو مبلغ صغير

٦٠- ما تعملش لايك لحاجات فيها موسيقى عشان ما تساعدهاش توصل لحد تاني

٦١- اي حاجة تعملها حط فيها نية، حتى لو حد سأل علي مكان تروحه ازاي تحتسب نية الصدقة فيها ولو حد طلب اي معلومة

٦٢- اي مسجد تدخله هتلاقي علي رف المصاحف، مصاحف قديمة امسك كل مصحف وأقرأ فيه ٥ دقايق عشان أصحاب المصاحف القديمة محدش بيقرأ منها

٦٣- روح اي مستشفى حكومي وانت معاك فاكهة مثلاً واسأل علي المرضى اللي مش معاهم حد بيزورهم وادي الحاجات للي موجود كأنها كانت لحد تاني بس انت مالقتهوش وده من نصيب الموجود

٦٤- ثبت نسبة من مرتبك مثلا ٢.٥ ٪ كل شهر بتطلعها صدقة

٦٥- لو اتخبطت في كرسي أو اتشكيت من دبوس بدل ما تزعق أو تضايق قول علي طول الحمد لله في وقتها

٦٦- وانتي في المترو خدي معاكي اكسسوارات بنات واديهم هدايا للبنات اللي بتبيع في المترو الصغيرين

٦٧- كل يوم الساعة عشرة ادعي لعشر اموات مختلفين يجوا علي بالك وبعدها ادعي لاموات المسلمين كلهم

منقول من تعليقات