تنبيه : التحويش بيختلف علي قد مرتبك واحتياجاتك الأساسية وظروف معيشتك والنصائح دي عامة وانت بتظبط فيها علي أساس ظروفك انت
امشي بمبدأ الأولوية (هل الحاجة دي انا محتاجها بدرجة قوي ولا متوسط ولا ضعيف يعني رفاهيات جدا؟)
لو حاجة انا محتاجاها اوي زي اكل أساسي في البيت هيقعد معايا وقت أو حاجة تخص صحتي أو تخص استعمالي اليومي (تبقي احتياج قوي).
لو حاجة ممكن استني عليها الشهر الجاي عادي مش هتطير (احتياج متوسط)
لو حاجة اصلا انا مش محتاجها ومش هتأثر بس انا شوفتها في مكان كده وعجبتني وهي تافهة اوي (احتياج ضعيف أو معدوم) زي الحاجات اللي في محلات ٢ ونص او الحاجات اللي بنشوفها في محلات الهدايا بشكل عام
اهم حاجة بتظبط ميزانية اي حد أنه يعرف بيصرف كام وبيشتري ايه عشان غالباً لو ما عملش كده هيلاقي نفسه صارف فلوس ومش عارف اتصرفت فين؟!
فخلي ورقة أو نوت التلفون معاك طول الوقت اكتب مصاريفك اليومية(طبعا ده لو انت لسه في أول مراحل التحويش ومش مظبط نظام معين بتمشي عليه)
تكتب كل حاجة انت محتاج تجيبها الشهر ده (بنظام الأولويات)
وأيا كان المرتب بقي بعد ما تخلص الأولويات بتشيل رقم علي جنب كده ده تحويش شهري -حسب ظروفك ومرتبك-
النصيحة الأهم هي - الهدف -
حتى لو هتجيبوا برطمان تكتبوا عليها هدف معين بتحوشوا عشانه هتكون حاجة مفيدة اوي وكل ما تحققوا هدف تدوروا علي هدف تاني وهكذا
(بالمناسبة لازم يكون في هدف يعني مش بنحوش وخلاص احنا)
نصائح - تساعد - انك تحوش احسن:
1- قللوا اكل من البيت عشان صحتكم قبل الفلوس وهاتوا وصفات لذيذة من النت واعملوها في البيت واللانش بوكس اللذيذ بتاعنا
2- بدل ما نجيب من السوبر ماركت الخضار مجمد وقت الموسم بتاعه، نقدر نجيبه من السوق عادي سعر اقل ونعمله بنفسنا ونشارك فيه وممكن نشيل في الفريزر وقت ما يكون نفسنا فيه
3- قللوا مشروبات غازية واستبدلوها بعصاير طبيعية صحياً قبل ماديا
4- انا عارفة انك بتفتحي الدولاب كل مرة تقولي معنديش لبس بس صدقيني مش هيحصل حاجة لو عديتي الشهر ده من غير ما تجيبي الفستان اللي ب٧٠٠ جنيه، واه هينزلوا عليه عرض تاني الشهر الجاي او اللي بعده
5- حفاظاً علي ميزانيتكم + صحتكم العقلية ما تسرحوش اوي في ريلز التيك توك عشان هيطلع لك عرض يخليكي تصرفي ال٥٠٠ جنيه اللي حوشتيهم بالعافية اخر الشهر، عادي نتفرج بس نبقي نضيف الحاجات اللذيذة دي لقايمة الحاجات اللي نفسنا فيها ونجيبها بعدين كنوع من المكافأة لنفسنا
ما تنسوش الصدقات كل شهر، ثبتوا مبلغ معين كل شهر تطلعوه صدقات أو إطعام. مش متخيلين البركة اللي هتحل في حياتكم بشكل عام
الفلوس اللي تحوشوها استثمروا بيها لأن تدريجياً قيمة الفلوس بتقل. اشتركوا في كورس يضيف لحياتكم المهنية أو اشتروا دهب مثلاً أو اعملوا مشروع صغير جنب شغلكم بالفلوس اللي حوشتوها.